रइपुर। छग के लोगन मन बर भुपेस सरकार के कतका सोचथे, तेखर कोनो ओर-छोर नइ हे। कोरोना बीमारी के मारे सरकार हलाकान हावय, तभो ले छग के लइका अउ माइलोगिन मन झन परसान होवय कहिके ओखर मन बर अलगे चिंता करत हे। तभे अइसन क्वारंटाइन सेंटर बनाए के निरदेस दे हावय, जिहां सिरिफ उही महिला मन ल रखे जाही, जेन मन गर्भवती हावय, या फेर जेन मन ह हाल म लइका ल जनम दे हावय।
अतके भर नइ, ये जम्मो माइलोगिन अउ लइका मन बर भरपुर बिचार करेगे हावय। ओखर मन के खान-पान कइसे होना चाही, का खवाना हे, लइका मन बर कइसन व्यवस्था करे जाही, जइसन जम्मो बात ल बने असन सोच-बिचार के छग के मुखिया भुपेस हर निरदेस दे हावय।
आंगनबाड़ी म जइसन व्यवस्था गर्भवती माइलोगिन बर करे जाथे, वइसनहे व्यवस्था क्वारंटाइन सेंटरों म घलोके करे जाही। जगदलपुर म 21 झन गर्भवती हावय, 7 झन सिसुवती हावय, त 47 झन लइका मन घलोक क्वारंटाइन सेंटर म अपन मां संग राहत हे। अइसने ह रजधानी म घलोक महिला मन बर अलग सेंटर बनाय गे हावय, जिहां ओखर मन के स्वास्थ के पूरा खयाल रखे के जिम्मेदारी संउप दे गे हे।